El Loroscopo del 2000 - Trieste - Lint 1999



El Mago de Umago, stroligo, tarocador, chiromastico, sensitivico, esoenterico, ostroporchico, cartomatico, sorzistico, vedotutico, baladevetrico, paranormantico, sperto in fature, ricivute fiscali, scontrini, scontri per guar le sicurassioni, candele benedete per far ciaro co va via la luce...  'desso ve fa

LE 7 PROFESSIE PAL TERSO MILEGNIO


A cossa credè, che mi no sio bon de far le professie? Mi, par vostra regola, son mago de dute le magie, de dute le striganse. Vedo inte la bala de vero, inte le carte, intei fondaci de cafè, nei segni del distin: in deperduto andove che se vedi el futuro che ga de vignir e che ancora no xe vignù mi vedo e i altri no vedi un caiser. Intanto bia saver che le professìe xe roba che dopo - fora che a noi maghi - ghe capita a duti de duto el mondo: Mericani, Chinesi, Norvegini, Todeschi, Neri de l'Africa, Furlani fin, e anca a qualche istrian. E 'sto qua parvia che le professie ve xe el distin del mondo, e vu podarè strucar fin che volè, chè quel ve ga de capitar e quel ve capitarà. E no monade...

Prima professìa pal terso milegnio

Se l'omo entro la fin del 2000 no finirà di fare macachessi cole tomiche, l'inclinamento, i gromisomi, piovarà setanta giorni su la Inghiltera (che quel xe normale), ma pioverà varechina verde e grandene come angurie e baloni de fotbal. Se invessi el ghe darà un taio, istesso sucederà qualcossa, ma de meno.

Seconda professia pal terso milegnio

Se in Italia no cambia el governo sarà caristia granda de luganighe, no cresserà più gnanca el cren, e ve tocarà magnar suf par vinti ani boni. Se invessi cambia sarà granda fraia: ma per una sitimana sola. E dopo no so.

 

Tersa professia pal terso milegnio

Ai tranvieri no ghe cresserà più le onge.

 

Quarta professia pal terso milegnio

Vegnerà un omo grando che ve ciaparà a papini duti quanti. Vu ghe dirè bongiorno, e lu ve darà un papin; vu provarè a scampar, ma lu ve ciaparà e ve darà un papin; vu pregarè che no 'l ve dia più papini, e lu ve darà una scariga de papini che no savarè andove girar la testa. Questo a duti, duto el mondo.

 

Quinta professia pal terso milegnio

Dute le televisioni del mondo mostrarà Pipobaudo vintiquatro su vintiquatro, e no servirà cambiar canal, sbisegar col telecomando: Pipobaudo e stropa...! chè la gente se coparà in massa del dispiasser de no saverselo più cavar de le bale.

 

Sesta professia pal terso milegnio

De duta la ua del mondo (bianca, nera, moscata) vignirà fora noma che malvasia. Guai a chi che bevi nero!

 

Setima e ultima professia pal terso milegnio

I Istriani regalarà bori a capei, par le strade, nele cese, nele buteghe magnative, sui trànvai... deperduto. E alora si sarà la fin del mondo!